Պատմական որոշման տարեդարձ

Արդեն 33 տարի է, ինչ Լեռնային Ղարաբաղի Ինքնավար Մարզի պատգամավորները որոշում կայացրեցին պահանջել ԼՂԻՄ-ի միացումը Խորհրդային Հայաստանին:

20 Փետրուար 1988-ին, այն ժամանակ Լեռնային Ղարաբաղի Ինքնավար Մարզի (ԼՂԻՄ) Գերագոյն Խորհուրդը դիմեց Խորհրդային Միութեան Գերագոյն Խորհուրդին՝ դուրս գալու Խորհրդային Ազրպէյճանի կազմէն և միանալու Խորհրդային Հայաստանին գործադրելով Սահմանադրական իր իրաւունքը: Ազրպէյճանի մերժումին, հակահայ բռնութիւններու արշաւին և 1991-ին Խորհրդային Միութեան կազմալուծման յաջորդած պատերազմին արդիւնքով, ԼՂԻՄ-ը յայտարարեց իր անկախութիւնը և հռչակեց Արցախի Հանրապետութիւնը: 1994-ին հաստատուած զինադադարէն յետոյ, արցախեան հիմնախնդրի վերջնական կարգաւորումը մնաց Ռուսաստանի Դաշնութեան, Ֆրանսայի և Ամերիկայի Միացեալ Նահանգներու համանախագահութեամբ կազմուած Մինսքի Խումբի ոլորտին մէջ: 27 Սեպտեմբեր 2020-ին, Թուրքիոյ և Ազրպէյճանի կողմէ Արցախի դէմ ծաւալուած քառասունչօրեայ պատերազմը եկաւ ցոյց տալու, որ Արցախը, որ ե՛ւ միջազգային իրաւունքով, ե՛ւ պատմականօրէն հայկական հողատարածք է, չի՛ կրնար մնալ Ազրպէյճանի կազմին մէջ: 20 Փետրուարն 1988-ի պատմական թուականի 33-րդ տարեդարձին առիթով, կը վերահաստատենք մեր յանձնառութիւնը՝ շարունակելու Արցախի Հանրապետութեան միջազգային ճանաչման պայքարը հիմնուած ժողովուրդներու ինքնորոշման իրաւունքին վրայ:

IARA – Արգենտինայի Հանրապետության հայկական հաստատություններ

Պուէնոս Այրես, Փետրվարի 20, 2021